Vil du verta Arborist?

Likar du tre og å arbeida ute (i all slags ver),
Slit du sånn passeleg med høgder eller ikkje i det heile  og ellers er sunn og frisk er kanskje ei framtid i trekrunene eller rotande rundt i trerøter på jakt etter skumle soppar noko for deg:)

Fagskulen i trepleie uteksaminerer no til våren kull nr to av lovande Arboristar og har no inntak av nye elevar.

Sjå her for info og påmeldingsopplysingar.

Det er først i den seinare tida at trepleieyrket har vokse fram her i landet, det byrja med eit par arboristar i Oslo på 80 - 90 talet, tok fart i byrjinga av 2000 talet og no er det over hundre utdanna trepleiarar her i landet, derav 6 med Fagskule - til våren vert det 11 til.
Det er ein stor marknad og nok tre til alle så om dette er noko som fenger deg vil du i alle fall ikkje utdanna deg til arbeidsløysa, tvert imot er det stor etterspurnad etter dyktige trepleiarar. Men det er eit krevjande studie og ein krevjande jobb så det passar ikkje for alle.

Passar det for deg...meld deg på så sjåast me til hausten:)

Kvifor ein skal bruka fagfolk til trepleie

Har saksa litt frå youtube, der er det mange døme på kvifor ein skal bruka ein sertifisert eller erfaren trepleiar når tre skal fellast eller pleiast.

Tree trimming accident
Oaaah
Laaaaang stige
Sweeeping
Einball, toball, treball...
Ups
Jadda
Nok tau
I think his saw stuck..
Tadatten ta ta taddelidi ta tatten ta ta dei
Og del 2

Dette kan nok sjå litt sprøtt ut men tru meg på at eg har bæde sett og høyrt om liknande ting mange gonger. Stort sett kjem folk frå det med livet i behald...

Folk flest har ingen vanskar med å få ein røyrleggjar til å fiksa røyrene, snikkar til snikring etc men det ligg ein god del mannleg prestisje i å kunna ordna noko så enkelt som å saga ned eit tre...












 

Trepleie i Førde Kommune

Trepleie i Førde

Trepleie er eit fag på lik linje med andre grøne og annleisfarga fag. Det er fleire sertifiseringsordningar samt ei fagskuleutdanning for trepleiarar.
I større byar og andre stader der bestillarar bryr seg er det stilt krav til dei som skal forvalta og stella eigaren sine tre – og kvifor det skal tru.
For det første er det dyrt å planta og etablera eit tre langs gater og vegar, dei må stellast og passast så dei i det heile skal veksa opp.
Når dei er større og byrjar å verta til pryd for ålmenta må dei jamnleg beskjærast for å få ein god og sikker krunestruktur.
Når dei er retteleg store og fine må dei reinskast for tørre kvistar og anna som kan detta i hovudet på folk og ein må sjå etter at dei er trygge.
Det skal altså meir kunnskap til enn å kunna starta ei motorsag og leiga ein lift!
Ansvarleg i kommunen si utsegn om at det er det same korleis berre dei er beskorne minner sterkt om Tine sin Jarlsberg reklame: “Samma det, gulost er gulost”
Eg reknar med at samme lemfeldige omgang med krav til kompetanse også går att når andre tenester skal tingast, trepleiarar kan også vera gode røyrleggjarar.
Det som er gjort her no er at desse bøkane er øydelagde, dei vil sjølvsagt vera grøne frametter men vil vera avhengige av mykje stell for å halda seg nokonlunde. Det vil sei at kommunen ved å tinga ukvalifisert beskjæring har kjøpt seg eit stort framtidig vedlikehald eller på godt Norsk – kjøpt katten i sekken!
Eg ser at mange meiner det ville vorte så mykje dyrare om det hadde vorte gjort av kompetente folk på skapeleg vis. Det er absolutt ikkje belegg for å hevda det, på Fagskulen i Trepleie underviser me folk i teknikkar som skal gjera dei konkurransedyktige i høve folk utan peiling pluss at dei skal kunna produsera eit mykje meir bærekraftig resultat med minimalt vedlikehald i framtida.
Eg ser mange artige innlegg i denne strengen, det som er positivt er at folk engasjerer seg om tre. Dersom ingen bryr seg skjer det heller ikkje noko!
Til sist – dersom det var meininga å ha små tre langs vegen, kvifor då planta bøk med eit potensiale til å verta over 20m høge?? Det finns då mange gode småvkasne tresortar.
Kanskje ein trepleiar skulle vore spurt før plantinga og..

Trefelling i Slottsparken

Slottsgartnaren i Slottsparken har bestemt at 150 tre i ein alle skal fellast. Eg har ikkje sett trea så eg skal ikkje uttala meg om det men Andreas Løvold har sett dei. Han har skrive ein artikkel i Aftenposten om saka, les og døm sjølve.

Krossfelling

I Gulen sto ein gamal steinkross utanføre kyrkjegarden i over 1000 år heilt til kyrkjeleg fellesråd fann ut at ei stor lønn i nærleiken måtte fellast så ho ikkje skulle ødeleggja krossen om velta i ein storm. Det lokale skyttarlaget vart hyra inn til jobben, gravsteinar vart flytta, vinsjar etc sett opp og ... delar av treet datt på krossen og knekte han.
Saka er no meld til politiet sidan det er tale om eit automatisk freda kulturminne. Kyrkjeleg fellesråd vil ikkje skulda på dei lokale bøndene i skyttarlaget som utførde jobben, det er tilsynelatande eit hendeleg uhell.

No vil det vera verdas enklaste sak å raljera med denne triste saka her i bloggen men eg skal lata det liggja, eg vil berre påpeika at det faktisk finnes fagfolk som feller slike vanskelege tre dagstøtt med godt resultat. Fagfolk med ei 10 mill anleggsforsikring, utdanning i fagfeltet og lang praksis og som ikkje hadde kosta meir enn dei som utførde oppdraget.

Spørsmålet som politiet i si etterforsking naturleg må spørja seg er om oppdragsgjevaren her hadde sikra seg at utførande hadde naudsynt kompetanse for oppdraget, ville dei td brukt same folka til å fiksa det elektriske anlegget, røyropplegget, leggja tak eller måla kyrkjetårnet.
Oppdragsgjevaren har også eit stort ansvar til å sjekka kompetansen til dei som vert sett til eit oppdrag!

Linke her

Arborist fagskulen

Då nærmar søknadsfristen seg for fagskulen i trepleie. Dersom de har tenkt på å søkja på denne unike utdanninga er det no på tide å putta søknaden i posten, hugs det er to år til neste opptak!
De finn mykje info om utdanninga på heimesidene til Hjeltnes Gartnarskule men i korte trekk er det ei praktisk teoretisk utdanning innan trepleie som går over to år på deltid. Det er ei vekesamling på skulen i månaden og ei praksisveke ute i arbeidslivet i månaden.
Ved bestått eksamen får ein tittelen Fagskuleutdanna Arborist og er godt rusta til ein av verdas beste jobbar :)

Årsmøte NTF

Det nærmar seg årsmøtekonferansen til NTF, årets happening for oss treskallar!
Dei som ikkje har fått med seg dette storhendet bør ta ein titt her
I år er det Bergen som er staden og me ser fram til eit par fine dagar i Noregs finaste by - byen som vår Herre er så glad i at han vaskar han mest kvar dag:)
Det er mykje interessant på programmet - berre ta ein titt, ekstra interessant er det at det via ein heil dag til konkurranseutsetjing og problemstillingar rundt offentlege innkjøp. Altfor ofte er me vitne til at me små trepleiefirma tapar i konkurransen for store multitask firma som kjøper inn kompetansen vår etterpå til ein sterkt skvisa pris.
Skal og verta interessant å høyra kva større aktørar seier om oppfølgjinga av slike tilbod.

Søk på Arboristfagskulen!

Nåja, ikkje alle og einkvar då men de som brenn for tre og trepleie og har føresetnader for yrket.
Her ligg ein link til Hjeltnes og meir informasjon om utdanninga.
Det vert teke opp elevar annankvart år, og i år er det opptak med søknadsfrist 15. april.

Å vera arborist er på mange måtar eit spanande yrke. Deler av arbeidsplassen er høgt oppe i trekrunene - gjerne med motorsager og tunge løft i tau, då gjeld det å vita kva ein gjer. Andre deler er på bakken med planting, diagnostisering, trevurderingar etc. Sjølvsagt må ein vita kva ein gjer der og :)

Er du interessert - gå inn på linken og les og kontakt evnt Andrid på Hjeltnes for meir informasjon.

Treet si nyttårsfeiring

I Jødedommen har til og med trea si nyttårsfeiring. Den er i januar etter vår kalender. Litt malplassert her sidan alle trea våre på den tid ligg i dvale, men i Israel er det annleis - det er på den tida trea vaknar til liv og byrjar å veksa.
Her ligg ein link til eit tidsskrift eg ikkje les til dagleg, men dette må vel vera ukontroversielt stoff :)

Koparspikar - myte eller fakta??

Det har i mange år versert historiar om at koparspikar drep tre. Nokon meiner at ein skal vera nok, andre tilrår fleire, gjerne dyppa i saltsyre etc.
Det rare er at alle har høyrt om nokon som har gjort dette men ingen har gjort det sjølve.
På denne linken finn de ein artikkel om ein som har teke dette på fullt alvor i sitt patetiske forsøk på å drepa ein gamal fin lønn.
Det ville vera skummelt om metallet kopar var så giftig for levande organismar at ein spikar kunne drepa eit heilt tre - i så tilfelle trur eg nok at fri omsetnad av kopar var rimeleg uaktuelt.
Kva trur de folkens, har nokon av dykk prøvd det med success??

Asken slit

Det ser ut som om asketrea på Voss er i store vanskar i år. Mange av dei har ikkje skote lauv i toppane, i staden kjem det vasskot lenger nede, ein av desse er ein relativt ung ask i hagen min. Det kan på mange måtar minna om askeskot sykje men er nok neppe det. Det er nok heller den kalde berrfrosten i fjor haust, den som tok halve jordbæråkeren min, som er syndaren.
Eg kutta av ein tørr greinspiss i dag for å sjå etter teikn på askeskotsykje, eg fann ikkje det men merkeleg nok var den tilsynelatande tørre greina frisk inni med grønt og fint kambium. Det verkar som om det har vore knoppane som har fenge nådestøytet. Skal verta interessant å følgja med framover om treet mitt og dei andre "tek" seg att på dei nakne delane, ellers er det desverre berre å hogga ned sidan prydverdien er borte.

Gatetre 2

Då vart det ein Prunus mackii eller neverhegg som vart planta utanføre Voss Sparebank. Ved eit merkeleg samantreff er det eksakt same treet som er planta utanføre Vekselbanken på Voss. Forsåvidt ikkje uventa forresten sidan begge bankane er noså like ellers og :)
Prunus mackii er ellers eit bra gatetre, vinterherdig, fin bløming, litt frukt og litt haustfargar så dei vil nok pynta bra opp i gatebiletet.
Eg har ein del andre framlegg som eg gjerne ville ha prøvd ein stad - det er viktig med litt mangfald i gatebiletet.
Ta gjerne kontakt om de skal planta noko.

Ny supervinsj

CPR Innovations ved Steven Ibeling har klekt ut ein ny lur vinsjtype for trefelling. Han verkar omlag som ein GRCS men i motsetnad til denne er det mogeleg å bruka to tau samstundes. Vinsjen er bygd opp av ein kraftig Harken vinsj i midten og med ein friksjonstrommel rundt. Denne kan brukast både til brems ved seksjonsfelling og til å kontrollera last som vert vinsja. I tillegg beskyttar han vinsjen.
Me har akkurat teke han i bruk og han verkar veldig bra, skikkeleg gjennomtenkt.
I Noreg kan de kjøpa vinsjen ved å kontakta Hogst og Rydding på tlf 90869340 eller epost svein.ringheim@hogstogrydding.no

Gatetre

Eg har fått ein førespurnad om å koma med framlegg til eit gatetre utanføre ein bygning på Voss. Ikkje så vanskeleg skulle ein tru men det vart ein del fundering likevel. Her er ein del kriterie som må oppfyllast:

• Plassen er avgrensa så det kan ikkje vera noko vidt tre.
• Uvisst kva som er under fortauet, så det kan ikkje vera for "fintfølande"
• Det bør minst tola H5
• Det må vera 4 meter opp til nederste greina på innsida og 5,5 meter ut mot gata, så treet bør vera over ti meter når det er utvakse.
• Høg prydverdi enten med haustfargar, bork, bløming og bladform.
• Det skal definitivt ikkje vera Sorbus og Tilia X europea `Pallida`

Nokon som har nokre gode framlegg? Legg dei inn som kommentar under.

NM i treklatring

På laurdag er det NM i treklatring i Oslo. For første gong på mange år kan eg ikkje vera til stades, det er midt i innspurten i bygginga heime på Store Ringheim så eg vert nok ståande med målarkosten heile helga.
Litt surt men ikkje noko å gjera med det.
Det er meldt eit fantastisk ver så alt ligg til rette for eit fint meisterskap så eg vonar mange tek turen og deltek eller ser på.
NM er så mykje meir enn berre ein konkurranse, det er på mange måtar årets høgdepunkt for oss som likar å kliva i tre. Her møtest me ein gong i året og knyter nye band.
Det er også ein stad for å utveksla nye idear og teknikkar, visa nytt utstyr osb.
Det har alltid vore meininga at det ikkje skal vera høg terskel for å delta, det er rom for alle. Nokon er sjølvsagt svært gode og trenar hardt fram til denne dagen, andre er kanskje med mest for moro skuld. Det er i utgangspunktet gleda over å kunna koma seg fram oppi desse fantastiske skapnadane som trea er, som skal stå i fokus.
Ha ein fin dag!

If there were no trees...

Sjå her for å finna ein fin artikkel om tre eg fann på Dave´s Garden sitt nyhendebrev. If there were no trees.. av Sharon Brown.
Ein aktuell tanke no om våren når folk ringer og vil ha felt hagetrea sine. Tenk den tanken..om det ikkje var tre.
Utenkeleg, sjølv dei største solelskarane og trefiendane tykkjer det. Likevel vil dei hogga ned trea i hagane sine og spesielt i naboane sine hagar - forstå det den som kan.
Les og kos dykk med artikkelen.

Når kastanjene visner i Bygdø Allé..

Det har vore kritisk for hestekastanjane i Bygdø Alle ei stund. Vanskeleg for tre som har vakse opp med god plass, sporadisk biltrafikk og hestetrafikk å tilpassa seg det moderne livet. Rikeleg med salt har ikkje vore til hjelp.
No er det på gang ein ny redingsaksjon, Erik Joner i Bioforsk skal i samarbeid med eit Tsjekkisk firma sprøyta inn mychorriza (sopprot) i grunnen rundt trea for på den måten å betra evna deira å ta opp næring.
Me vonar det beste men er litt skeptisk. Resultatet vil visa seg etter nokre år.
Sjå linken her

Dyr? platanlønn i Trondheim

Ei dame i Trondheim har funne det for godt å fella ein Platanlønn, Acer pseudoplatanus, som sto i vegen for sola.
Ho hade søkt kommunen om å få løyve til å fella treet og fått avslag, men ho felte likevel. Det var klausul på treet etter plan og bygningslova og dette visste ho om då huset vart kjøpt. Platanlønna har stende der i bortimot 150 år, damo såg heller ung ut og var vel heller eit levande prov på at vitet veks med bolen eller meir direkte - ho har mykje å gå på når det gjeld vanleg folkavit.
Ho fekk då også 30000,- i bot for udåden, høgst fortent. Men no er ho sjølvsagt foruretta og kjenner seg urettvist handsama. Bakgrunnen er sjølvsagt den berømte svartelista der platanlønnen står som einaste tre. Dette er då tolka meir enn bokstaveleg som at alle artar på svartelista skal utryddast i Noreg. I dette synet har ho sjølvsagt fenge støtte frå FRP som er imot alt framand og saka vert teken opp i stortinget. Det er heilt rett, det burde vore teke opp i stortinget, men då om korleis ein skal få betre rettsvern for alle store gamle tre som står i private hagar og er offer for tilfeldig behandling av eigarane, ikkje at ei dame i Trondheim skal få verta solbrend!
Sjå linken her

IKEA trea eitt år etter

Ein av innlegga eg skreiv i denne bloggen i fjor var det om vandalskjæringa av trea på parkeringsplassen til IKEA i Åsane i Bergen. Eit vaktmeisterfirma hadde gått laus og hakka på trea etter beste evne med eit litt miserabelt resultat, men dei fekk sikkert godt betalt.
No var eg ein liten tur på IKEA att og gjekk forbi desse trea eitt år etter. Resultatet var vel omlag som forventa. På alle "knaggane" som sto att var det no kome vasskot, etter ein par tre år er trea overgrodde av villvekst og ser ikkje ut. Då lyt nok vaktmeisteren ut med saks og sag att, pengar i slikt!
Ei god oppskrift på å laga stygge tre av fine, stå på!

Workshop i redning og NM i Treklatring

Datoane 28-30/4 må de setja av til ein tur til Oslo. Då er det mange gode ting på gang. Først vert det to dagar med workshop i redning med Mark Bridge, ein av dei beste trekaltrarane i Europa, som lærar. Arrangør er NTF. Dette vert garantert svært interessante dagar. Deretter vert det NM i treklatring på laurdag den 30.04. i Universitetsparken, dette er årets happening for oss liksomapar som aldri heilt har slutta å klatra i tre. Det er moro, litt alvor, interessant og den dagen me møter likesinna som forstår kva me seier :)
Ta ein tur då vel!
Meir info på NTF sine heimesider